/
 

Blakdeild Aftureldingar býður börn og fullorðna velkomin!

Blakdeildin heldur úti æfingum fyrir iðkendur á öllum aldri:  Krakkablak fyrir börn, meistaraflokkar fyrir keppnisfólk  og trimmhópar fyrir þá sem eru styttra á veg komnir í íþróttinni, bæði í karla- og kvennaflokkum. Afturelding býður eina bestu aðstöðu landsins til blakiðkunar og er hægt að setja upp 9  blakvelli í fullri stærð eða 19 krakkablaksvelli undir sama þaki.  Einnig má nefna að Blakdeild Aftureldingar er eina deildin í landinu sem á blakvél til að aðstoða við æfingar. Blakdeildin býður einnig upp á strandblak og er strandblaksvöllurinn á útisvæðinu vel nýttur. Blakdeildin hefur þá eindregnu stefnu að ráða ávalt vel menntaða, reynslumikla og metnaðarfulla þálfara í öllum flokum.

 

Afturelding tvöfaldur bikarmeistari í blaki

 

Afturelding náði þeim magnaða árangri að verða tvöfaldur bikarmeistari í blaki því bæði karla- og kvennalið félagsins fögnuðu sigri í bikarúrslitum Kjörísbikarsins. Þetta er í fyrsta sinn sem karlalið félagsins verður bikarmeistari og má með sanni segja að sigurinn hafi verið ótrúlegur en Afturelding lagði sterkt lið Stjörnunnar að velli í oddahrinu.

Afturelding vann fyrstu hrinuna með ótrúlegri endurkomu eftir að hafa verið 24-18 undir. Stjarnan vann þá tvær hrinur í röð og var í vænlegri stöðu. Lið Aftureldingar neitaði að gefast upp, vann fjórðu hrinuna með mikilli baráttu. Í oddahrinu kom lið Aftureldingar aftur tilbaka eftir að hafa verið 12-9 undir og tryggði sér sinn fyrsta bikartitil í sögu félagsins.

Alexander Stefánsson hjá Aftureldingu var valinn maður leiksins en hann skoraði 34 stig í úrslitaleiknum.

Bikarmeistari þriðja árið í röð

Sigurgleði Aftureldingar hélt áfram því konurnar fögnuðu einnig bikarmeistaratitli eftir 3-0 sigur á HK. Þetta er þriðja árið í röð sem Afturelding verður bikarmeistari en liðið er einnig ríkjandi Íslandsmeistari í greininni.

Fyrsta hrinan var æsispennandi og náði Afturelding forystunni eftir upphækkun, 28-26. Önnur hrinan fór 25-20 og sú síðasta 26-24 var sigur Aftureldingar í raun aldrei í hættu þó að þriðja hrinan hafi verið mjög spennandi.

Kate Yeazel var atkvæðamest í liði Aftureldingar með 18 stig í jöfnu og góðu liði Aftureldingar. 

Árangur helgarinnar er ekki síst vitnisburður um það frábæra starf sem unnið er innan blakdeildar Aftureldingar. Þetta er stór áfangi fyrir félagið og óskum við öllum þeim sem koma starfi blaksins í Aftureldingu; leikmönnum, þjálfurum og forystufólki blakdeilda Aftureldingar til hamingju með þennan stórglæsilega árangur.