/
 

Velkomin á upplýsingavef Ungmennafélagsins Aftureldingar

Innan vébanda Aftureldingar starfa tíu deildir sem bjóða upp á metnaðarfullt starf, hver á sínu sviði, þar sem unnið er að markmiðum félagsins sem felast annars vegar í uppeldis- og lýðheilsustefnu þess og hins vegar í afreks- og keppnisstefnu félagsins. Afturelding gegnir mikilvægri samfélagsþjónustu í Mosfellsbæ og  hefur heilsu allra aldurshópa í Mosfellsbæ að leiðarljósi með því að hvetja til og standa fyrir heilbrigðri afþreyingu í formi íþrótta og hreyfingar ásamt því að glæða daglegt líf íbúa í sveitarfélaginu uppbyggilegu og heilbrigðu félagsstarfi.

 

Unnu til verðlauna á Gautaborg Open

Karatedeild Aftureldingar átti þrjá keppendur á alþjóðlegu móti sem fram fór í Gautaborg í Svíþjóð í byrjun maí.

 

Alls tóku 634 keppendur þátt frá tólf löndum í Gautaborg Open að þessu sinni. Keppt var í barna, unglinga og fullorðinsflokki. Liðsmenn Aftureldingar, þeir Matthías Eyfjörð, Máni Hákonarson og Þórður Henrysson unnu allir til verðlauna á mótinu. Máni vann silfur í sínum flokki í einstaklings kumite og Þórður tók bronsverðlaun. Matthías tapaði naumlega í baráttu um brons í kumite cadet -70 kg og lenti í fimmta sæti. Í einstaklingskeppni í kata hlaut Þórður brons en Matthías og Máni lentu þar í fimmta sæti í mjög sterkum riðli. Loks hlutu þeir félagar brons og bikar í hóp kumite eftir að hafa tapað fyrir geysi sterku liði frá Noregi sem vann til gullverðlauna. Þeir Matthías, Máni og Þórður stóðu sig framúrskarandi vel á þessu fjölmenna móti og voru deildinni til sóma.

Á meðfylgjandi mynd má sjá þá Mána og Þórð á verðlaunapalli fyrir keppni í einstaklings kumite.