/
Back to homepage
 

Velkomin á upplýsingavef Ungmennafélagsins Aftureldingar

Innan vébanda Aftureldingar starfa tíu deildir sem bjóða upp á metnaðarfullt starf, hver á sínu sviði, þar sem unnið er að markmiðum félagsins sem felast annars vegar í uppeldis- og lýðheilsustefnu þess og hins vegar í afreks- og keppnisstefnu félagsins. Afturelding gegnir mikilvægri samfélagsþjónustu í Mosfellsbæ og  hefur heilsu allra aldurshópa í Mosfellsbæ að leiðarljósi með því að hvetja til og standa fyrir heilbrigðri afþreyingu í formi íþrótta og hreyfingar ásamt því að glæða daglegt líf íbúa í sveitarfélaginu uppbyggilegu og heilbrigðu félagsstarfi.

 

Hvað er Taekwondo

Hvað er Taekwondo

Uppruni Taekwondo

Taekwondo er upprunnið í Kóreu.  Elstu heimildir um stundun bardagalista sem rekja má til Taekwondo eru um 2000 ára gamlar.  Þá voru listirnar kallaðar Súbakdo, Taek Kyon eða einfaldlega Mú Súl sem merkir bardagalistir.  Á þessum 2000 árum hafa orðið miklar breytingar á tækninni, hefðum og notkun hreyfinganna.  Fyrst um sinn voru þær eingöngu til hernaðar, oft gegn innrásarherjum frá Kína og Japan.  Fólkið þróaði tæknina áfram gegnum aldirnar og þrátt fyrir ítrekaðar tilraunir hernámsliða og yfirvalda um að banna eða bæla niður ástundun þeirra náðu þær að halda velli.

Algengur miskilningur fólks er sá að gera ráð fyrir að iðkendur hernaðarlista hafi æft þær með þeirri hugsun að þeir ætluðu bókstaflega að nota hendur og fætur til að yfirbuga og drepa óvininn.  Þetta er ekki alls kostar rétt.  Tæknin var mikið frekar notuð til að kenna hermönnum að bera sig rétt að við meðferð vopna.  Þannig sést enn þann dag í dag að skylmingafólk notar t.d. aðallega tvær grunnstöður við sína iðkun, ap kúbí (fram-stöðu) og dúít kúbí (bak-stöðu).  Þegar skylmingakappi verst stendur hann í dúít kúbí en stekkur svo fram í ap kúbí þegar hann reynir að koma höggi á andstæðinginn.  Varnir og högg voru svo aðferðir til að kenna hermönnum að fá hámarkskraft í hreyfingar með vopn.

Með þessu sést að hugsunin á bak við tæknina er oftast nær mun meiri og flóknari en lítur út í fyrstu.  An magí  (vörn fyrir maga) var t.d. aðferð til að æfa sverðshöggshreyfinguna.  Högg var aðferð til að æfa stungu, með sverði, lagspjóti eða öðru.  Og tilgangurinn með vörnum var einnig sá að styrkja hendurnar fyrir það að verjast vopnuðum árásum með skjöld á hendinni.  Auðvitað var tæknin líka notuð með berum höndum eins og nöfn margra bardagalista sanna, t.a.m. Karate (tóm hönd).

Í dag blómstra bardagalistirnar sem aldrei fyrr.  Tilgangur þeirra hefur þó breyst talsvert og er þessi þróun að mínu mati aðalorsök þess að bardagalistir eru enn stundaðar.  Ekkert lifir af án þess að þróast.  Það segir sig sjálft að bardagalistir sem slíkar eru úreltar í dag, á dögum skotvopna og annarra vopna sem ekki er hægt að verjast með berum höndum.  Tilgangur bardagalista í dag er nær því að vera mannrækt frekar en hernaðarlist.  Með ástundun bardagalista eins og Taekwondo öðlast fólk betri heilsu og aukið jafnvægi í lífið.  Hvort tveggja bráðnauðsynlegt í hröðu nútímaþjóðfélagi.

Drekaævintýri Taekwondo deildar UMFA

Boðið verður upp á drekaævintýrið tvisvar sinnum yfir sumarið. Það stendur yfir í tvær vikur en þó verður hægt að skrá sig aðra vikuna.
Fyrra námskeiðið er frá 18. júní- 29. júní og seinna námskeiðið frá 7. - 17. ágúst og mæting klukkan 9:00 alla virka daga.
 
1 vika = 6.000 kr. 2 vikur = 12.000 kr.
 
Skráning fer fram á afturelding(at)tki.is og frekari upplýsingar um námskeiðið fást á http://www.afturelding.tki.is

Nemendavefur TKD UMFA

Nýtt ár stútfullt af Taekwondo viðburðum

Ekki gleyma að kíkja á nemendavefinn okkar afturelding.tki.is

Kæru iðkendur og foreldrar. 

Nýtt ár hefur gengið í garð og ferskir vindar blása nú innan um sveitta búninga hjá iðkendum deildarinnar. Fjöldin allur af viðburðum verða haldnir á önninni og því mikið annríki hjá iðkendum og þjálfurum og stuðningur foreldra heima við mikilvægur. 

Við höfum fengið til liðs við okkur nokkra nýja þjálfara sem munu hver um sig einbeita sér að sínu sérsviði og iðkendur fá því aðeins það besta sem völ er á. 

Í ár verða tveir hópar sameinaðir en það eru unglingar og fullorðnir sem mun koma til með að auka fjölbreytni fyrir iðkendur í þeim hópum á æfingum. Sú æfing mun einnig lengjast um 30 mínútur. 

Aðrir hópar eru Börn 6-8 ára og svo Krakkar 9-12 ára. Nokkrir iðkendur á aldursmörkunum munu fara annað hvort upp um hóp eða niður um hóp ef við á. 

Börn 6-8 ára mun æfa á sama tíma og íþróttafjörið og er hópurinn því töluvert stærri en skráningin hér segir til um. 

Fyrsta æfingin hefst á mánudaginn 9. janúar samkvæmt nýrri tímatöflu (sjá hér fyrir neðan) og laugardaginn þar á eftir verður opinn skráningardagur. Afturelding tók í gagnið nýtt félagakerfi á síðustu önn eins og mörgum er kunnugt en Taekwondo deildin ætlar að halda opin skráningardag á laugardaginn 14. janúar í salnum fyrir foreldra sem vilja skrá og borga á staðnum í stað þess að gera það í gegnum netið.

Æfingar hefjast mánudaginn 9 janúar

Æfingar hjá Taekwondodeild Aftureldingar hefjast mánudaginn 9 janúar, sjá tímatöflu.