Um helgina fór fram lokamót Íslandsmóts 7. flokks karla í körfubolta að Varmá og óhætt er að segja að helgin hafi tekist einstaklega vel í alla staði. Mikil stemning var í húsinu frá fyrsta leik á föstudagskvöldið og fram á síðasta flaut á sunnudeg. Fjölmargir gestir, leikmenn, þjálfarar og stuðningsfólk lögðu leið sína í Varmá og sköpuðu frábæra umgjörð utan um mótið. Samtals 70 leikir voru spilaðir frá morgni til kvölds alla helgina og víða sáust glæsileg tilþrif, barátta og mikil gleði hjá framtíðarstjörnum körfuboltans.

Afturelding í sókn

Það var að lokum lið Stjörnunnar sem stóð uppi sem Íslandsmeistari í 7. flokki karla eftir glæsilega frammistöðu. Í öðru sæti var lið KR og Breiðablik fékk bronsið.

Við hjá Aftureldingu erum afar stolt af því að hafa fengið að halda svona stórt og glæsilegt mót og viljum senda öllum þátttakendum kærar þakkir fyrir komuna og góða stemningu yfir helgina.

Körfuboltadrengir í Aftureldingu mönnuðu ritaraborðin

Sérstakar þakkir fá einnig allir þeir fjölmörgu sjálfboðaliðar sem lögðu hönd á plóg og hjálpuðu til við að gera mótið eins veglegt og raun bar vitni. Án ykkar væri svona viðburður einfaldlega ekki mögulegur. Einnig viljum við þakka öllum dómurum, starfsfólki mótsins og þeim sem komu að skipulagningu og framkvæmd kærlega fyrir sitt framlag og frábært samstarf.

Takk fyrir frábæra körfuboltahelgi á Varmá!

Áfram Afturelding Körfubolti

Fjörugir leikir

Dómarar stóðu sig með príði

Vörn og sókn

Sævaldur yfirþjálfari sáttur með helgina