Körfuknattleiksdeild Aftureldingar í Mosfellsbæ hefur framlengt samning sinn við Sævald Bjarnason sem mun halda áfram sem yfirþjálfari deildarinnar. Sævaldur hefur starfað hjá félaginu í heilan áratug og náð góðum árangri á þeim tíma. Undir stjórn Sævaldar hefur fjöldi iðkenda í körfubolta hjá Aftureldingu aukist jafnt og þétt og eru nú tæplega 200 einstaklingar sem stunda íþróttina hjá félaginu. Sem yfirþjálfari sér Sævaldur um þjálfun 11. flokks og meistaraflokks, auk þess að koma að þjálfun 5. flokks að hluta.

„Það er virkilega gaman að taka þátt í þessari vegferð og að sjá starfið vaxa og dafna með hverju árinu,“ segir Sævaldur. „Á næstunni munum við leggja áherslu á að rækta meistaraflokkinn enn frekar, en um leið að efla og styrkja grasrótina í barnastarfinu. Þar liggur framtíðin.“

Heiðar Logi Jónsson, formaður körfuknattleiksdeildar Aftureldingar, lýsir ánægju sinni með áframhaldandi samstarf: „Við erum mjög sátt við að Sævaldur sé til í að halda áfram að byggja upp öflugt körfuboltastarf í Mosfellsbæ. Reynsla hans og metnaður hefur skilað sér í stöðugum vexti deildarinnar undanfarin ár.“

Körfuknattleiksdeild Aftureldingar hefur verið í mikilli sókn og hefur starf félagsins vakið athygli fyrir fagmennsku og góðan árangur.