Telma Þrastardóttir fór mikinn í sókn Aftureldingar og skoraði þrennu í leiknum. Telma ógnaði vörn FH stöðugt með hraða sínum og krafti og hefði vel getað gert fleiri mörk en hún átti m.a. skot í stöng úr aukaspyrnu. Sigríður Þóra Birgisdóttir var einnig öflug en hún hefur tekið við fyrirliðastöðunni og var liðsfélögum sínum mikil fyrirmynd í leiknum með dugnaði sínum og áræðni. Sigga skoraði eitt mark og reyndar annað sem var dæmt af auk þess sem hún var áberandi í sóknaraðgerðum okkar og vann vel til baka.
Þá er Eydís Embla Lúðvíksdóttir einnig valin í lið umferðarinnar en Eydís hefur spilað hreint frábærlega í síðustu leikjum og er á góðri leið með að verða lykilmaður á miðjunni. Eydís er nýorðin 17 ára og hefur verið burðarás í liði Aftureldingar í yngri flokkunum undanfarin ár en er nú í sumar að taka skrefið uppí meistaraflokk og er heldur betur að standast það próf með prýði.
Knattspyrnudeild óskar stelpunum sínum til hamingju með þessa skemmtilegu viðurkenningu
