Um helgina mættu yngstu körfuboltakrakkarnir okkar úr Aftureldingu á Fjölnismótið í Grafarvoginum, þar sem 1.–4. bekkur tók þátt með eldmóð og bros á vör. Alls voru um 45 krakkar frá Aftureldingu sem tóku þátt í níu liðum sem voru skráð til leiks – átta strákalið og eitt stelpulið. Þau öttu kappi við fjölmörg lið úr öðrum félögum og spiluðu ótal spennandi leiki síðustu tvo daga.

Það ríkti mikið fjör og leikgleði á mótinu, og krakkarnir sýndu á köflum glæsileg tilþrif sem gleðja hvert körfuboltahjarta. En dagskráin snerist ekki bara um keppni – heldur líka um skemmtun! Á milli leikja á laugardeginum var farið í bíóferð í Egilshöll og haldin síðdegisvaka þar sem Húbba Búbba mætti á svæðið og sá um að skemmta hópnum! 🤩

Fjölnismótið er frábært upphaf á keppnistímabilinu fyrir okkar krakka en þau eru að mæta á sitt fyrsta mót í vetur.  Þar eru sumir að stíga sín fyrstu skref á vellinum á meðan aðrir fengu tækifæri til að máta sig við jafnaldra úr öðrum liðum í fyrra og voru að prófa sig áfram og sjá framfarir.

Þjálfarateymið var í skýjunum eftir helgina:

“Við erum ótrúlega ánægð með gleðina hjá krökkunum – það er svo gaman að sjá vináttuna, samheldnina og hvað þau njóta þess að spila saman,” segir Sigurður Stefán, þjálfari Aftureldingar. Aðstoðarþjálfarar hans tóku í sama streng. “Þetta er nákvæmlega það sem körfuboltinn á að snúast um!” 🏀

Afturelding körfubolti er stolt af sínum ungu íþróttakrökkum – framtíðin í körfubolta lítur sannarlega björt út í Mosfellsbænum.