Það er knattspyrnudeild mikil ánægja að tilkynna að samningar hafa verið undirritaðir við miðvörðinn efnilega Söru Leu Svavarsdóttur sem er 15 ára gömul og uppalin í Aftureldingu.  

Sara hefur þrátt fyrir ungan aldur leikið reglulega með 2.flokki félagins undanfarin tvö ár ásamt því að spila með 3.flokki. Hún var verðlaunuð fyrir góða frammistöðu í sumar þegar hún var kölluð í leikmannahóp meistaraflokks fyrir leik gegn Breiðablik í Pepsideildinni en hún kom við sögu í einum leik með meistaraflokki í Lengjubikarnum í vetur.

Sara Lea er sterkur og yfirvegaður leikmaður sem les leikinn vel og hefur getið sér orð sem einn efnilegasti varnarmaður sem Afturelding hefur eignast. Hún verður 16 ára í desember og hefur tekið þátt í verkefnum með U17 kvennalandsliðinu og væntir knattspyrnudeild mikils af henni á næstu árum hjá félaginu.