Árleg uppskeruhátíð Karatesambands Íslands var haldin 13. desember 2025, en þá er valinn karatemaður og -kona ársins, auk þess sem verðlaun fyrir bikarmót unglinga og fullorðinna eru afhent.

Karatemaður ársins

Þórður Jökull Henrysson var valinn karatemaður ársins 2025 af stjórn KAI en þetta er í þriðja sinn sem hann er valinn. Þórður átti gott keppnisár en hann keppir eingöngu í kata. Hann vann öll mót innanlands á árinu í kata, RIG, Íslandsmeistaramót og Bikarmót. Á alþjóðlegum vettvangi vann hann brons á Smáþjóðamótinu í Andorra en þetta var í fyrsta sinn sem keppt var í karate á mótinu. Hann vann silfur á Swedish Open, varð í fimmta sæti á Norðurlandameistaramótinu, sjöunda sæti á Copenhagen Open og svo vann hann silfur á Int. Amsterdam Karate Cup núna í lok desmeber. Einnig tók hann þátt í Evrópumeistaramótinu sem haldið var í Armeníu á vormánuðum. Hann er fastamaður í landsliði Íslands í kata og er góð fyrirmynd og verðugur fulltrúi karateíþróttarinnar.

Eydís og Þórður, karatekona og karatemaður ársins

Kata 11 ára pilta

Aron Trausti Kristjánsson vann brons í samanlögðu í kata 11 ára pilta, en þetta er fyrsta árið sem Aron keppir í mótaröðinni. Frábær árangur hjá upprennandi keppnismanni.

Kata 14-15 ára stúlkna

Kristíana Svava Eyþórsdóttir  vann Grand Prix mótaröðina í bikarmóti unglinga í kata 14-15 ára stúlkna.  Í þriðja sæti var Eva Jónína Daníelsdóttir. Gríðarlega efnilegar keppniskonur hjá Aftureldingu.

Kata 14-15 ára pilta

Robert Matias Bentia vann silfur í samanlögðu í kata 14-15 ára pilta. Hann varð í öðru sæti í öllum fjórum mótunum.  Alex Bjarki Davíðsson fékk ekki verðlaun að þessu sinni en hann lenti í fjórða sæti. Mjög efnilegir keppnispiltar hjá Aftureldingu.

Bikarmót fullorðinna

Þórður Jökull varð í 2. sæti í bikarmóti fullorðinna, en hjá fullorðnum eru það samanlagður árangur í kata og kumite á bikarmóti sem gildir til sigurs í bikarmóti. Þórður keppir aðeins í kata og vann það örugglega og dugði það honum til að lenda í 2. sæti.