Stjarnan hefur verið í sérflokki á Íslandsmótinu í sumar og unnið alla sína leiki til þessa. Strax frá upphafi leiks var ljóst að þær bláu ætluðu sér ekkert að slaka á klónni og eftir tólf mínútur náðu þær forystunni og bættu tvisvar við hana fyrir hlé.

Eftir hlé héldu Stjörnustúlkur undirtökunum og bættu við fjórum mörkum áður en Danielle Sheehy náði að minnka muninn í lok leiks. Eftir úrslitin í þessari næstsíðustu umferð erum við enn með jafnmörg stig og FH en lakara markahlutfall. HK/Víkingur gerði jafntefli í sínum leik og eru þremur stigum á eftir okkur fyrir síðasta leik.

Lokaumferðin fer fram á sunnudag og þá heimsækjum við einmitt HK/Víking í Víkina og ræðst þá hvort liðið heldur sæti sínu í deildinni.