Afturelding er með fullt hús stiga eftir öruggan sigur á Víkingi Reykjavík í Grill66-deild kvenna í handbolta sl. föstudagskvöld, 26-10. Afturelding hafði mikla yfirburði í leiknum en staðan í hálfleik var 11-6. Í síðari hálfleik átti Afturelding sviðið og vann að lokum 16 marka sigur. Frábær byrjun á tímabilinu hjá stelpunum sem hafa unnið báða leiki sína til þessa.

Þóra María Sigurjónsdóttir var atkvæðamest í liði Aftureldingar. Hún skoraði 9 mörk og átti stórgóðan leik í vörn og sókn. Fanney Guðmundsdóttir kom næst með 4 mörk.

Næsti leikur Aftureldingar verður gegn ÍR föstudaginn 5. október í Austurbergi. Næsti heimaleikur er gegn HK-U 19. október.

Leikur Aftureldingar og Víkings R. var í beinni útsendingu á AftureldingTV og má sjá leikinn hér að neðan.