Af vefsíðu Handbolti.is

‘Ásmundur Einarsson fyrrverandi formaður handknattleiksdeildar Gróttu lést síðla í júlí. Hans verður minnst með leik á milli Gróttu og U18 ára landsliðs kvenna í Hertzhöllinni, íþróttahúsi Gróttu 7. september kl. 19.30. Katrín Anna, dóttir Ásmundar, leikur með báðum liðum.

„Allir handboltaunnendur og aðrir sem vilja minnast Ása eru hvattir til að mæta. Aðgangseyrir verður 1000 kr eða frjáls framlög. Sjoppusala verður á staðnum og mun öll innkoma aðgangseyris og sjoppu renna í styrktarsjóð barna hans: 512-26-204040, kt. 700371-0779,“ segir í tilkynningu handknattleiksdeildar Gróttu.

Á yngri árum var Ásmundur öflugur markvörður. Hann lék með KR og síðar Aftureldingu og var m.a. í liði félagsins sem varð Íslands-, deildar-, og bikarmeistari 1999. Einnig lék Ásmundur með yngri landsliðunum.

Fyrir nokkrum árum kom Ásmundur til starfa í barna- og unglingaráði handknattleiksdeildar Gróttu. Einnig átti hann sæti í heimaleikjaráði meistaraflokks um nokkurra ára skeið. Síðustu misseri var Ásmundur formaður handknattleiksdeildar Gróttu. Hann var sæmdur bronsmerki Gróttu árið 2021.