Körfuboltasamfélagið í Mosfellsbæ er ört vaxandi og á sunnudag hefur meistaraflokkur Aftureldingar í körfubolta vegferð sína í 2. deild Íslandsmótsins þegar sá flokkur er endurvakinn hjá félaginu. Fyrsti leikur er gegn Uppsveitum í N1 höllinni að Varmá kl. 14.00. Nokkur ár eru síðan Afturelding tefldi fram meistaraflokki og spennandi verður að sjá hvernig þeim tekst að fóta sig í deildinni í ár. Ákvörðun um að fara í þessa vegferð má fyrst og fremst rekja til þess að yngri flokka starfinu hefur vaxið fiskur um hrygg á undanförnum árum og gríðarleg aukning hefur verið í flestum yngri flokkum.
Til staðar er metnaður og vilja til þess að geta boðið iðkendum upp á frambærilega aðstöðu og meistaraflokk í framtíðinni. Enn fremur er þetta mikilvægt verkefni þar sem deildin hefur ekki á síðustu árum náð að fylla elstu flokkana og því misst körfubolta Mosfellinga til annara liða á höfuðborgarsvæðinu. Það er staðföst trú stjórnar og þjálfara deildarinnar að með góðu og heilbrigðu yngri flokka starfi og metnaðarfullu afreksstarfi sé hægt að bjóða upp á flott verkefni í heimabyggð í meistaraflokki. Uppistaðan í slíku starfi hlýtur alltaf að vera með kjarna heimamanna.
Það er því mikið gleðiefni að geta loks kynnt hópinn en 8 uppaldir Mosfellingar munu taka slaginn með Aftureldingu í vetur. Nokkrir þeirra að koma til baka frá öðrum félögum á meðan aðrir eru að taka upp þráðinn aftur eftir hlé frá yngri flokkum og enn aðrir taka slaginn með okkur í fyrsta skipti. Þessir leikmenn eru (upptalning frá vinstri á mynd) :
- Bergsveinn Kári Jóhannesson f.2006 kemur heim frá ÍR
- Anton Örn Bjarnason f.2005 , Mosfellingur
- Eiríkur Karlsson f.2006 , kemur heim frá ÍR
- Magnús Gunnar Gíslason f.2003, Mosfellingur
- Magni Fannar Jónsson, f.2006 , kemur heim frá Fjölni
- Markús Ingvarsson, f.2005 Mosfellingur,
- Bragi Snær Hauksson, f. 2007 kemur heim frá Fjölni
- Hlynur Logi Ingólfsson f.1999, kemur heim frá Fjölni (vantar á myndina)
Frekari fréttir af leikmannamálum og leikmannahópnum sem tekur slaginn með Aftureldingu munu berast á næstu dögum.