John hafði frumkvæði af þessu samkomulagi af persónulegum ástæðum.  Mun hann í kjölfarið flytjast búferlum til heimahaga sinna á Írlandi og taka við nýjum verkefnum þar. John tók við starfi aðalþjálfara meistaraflokks Aftureldingar í júlí 2010.

Stjórn Aftureldingar er mjög þakklát fyrir þau störf sem John hefur unnið fyrir félagið þessi ár. Hann hefur verið vakinn og sofinn yfir velferð félagsins og staðið sig frábærlega. Nú eru aftur á móti tímamót hjá félaginu og mun stjórn félagsins gefa sér góðan tíma í að finna arftaka hans. Þar verður vandað til verka.

Góð sátt er um þessi starfslok og mun John áfram liðsinna félaginu sem ráðgjafi í þjálfara- og leikmannamálum. John lék sem kunnugt er með meistaraflokki karla í nokkur ár áður en hann sneri sér alfarið að þjálfun og þá hefur hann einnig þjálfað yngri flokka hjá félaginu ásamt því að sinna markmannsþjálfun til skamms tíma.

Knattspyrnudeild Aftureldingar þakkar John fyrir samstarfið undanfarin ár og óskar honum góðs gengis og velferðar í framtíðinni.