Afturelding kynnir sína menn fyrir tímabilinu 2026/2027

Meistaraflokkur Aftureldingar í körfubolta hefur samið við kraftmikinn og metnaðarfullan hóp leikmanna fyrir tímabilið 2026. Hópurinn er blanda af ungum og efnilegum Aftureldingarstrákum sem hafa spilað upp í gegnum yngri flokkana ásamt reyndum leikmönnum sem koma með mikla reynslu.

LEIKMENNIRNIR

Eðvald Ágúst Ragnarsson – bakvörður

Uppalinn Aftureldingarmaður sem hefur gengið upp alla flokka deildarinnar. Eðvald, fæddur 2009, spilar sem þristur og er þekktur fyrir mikinn kraft varnarlega og leggur sig alltaf 100% fram í sínum verkefnum fyrir liðið.  Hann stundar nám við Fjölbrautaskóla Mosfellsbæjar og er einn af hornsteinum þessa unga liðs.

Róbert Maron Jörgensen – bakvörður

Maron er sá sem hefur verið lengst í hinum sterka 2009 árgangi sem urðu Íslandsmeistarar í 9. flokki árið 2024. Hann er skotbakvörður og þekktur fyrir nákvæmni sína í skotum. Maron stundar nám við Menntaskólann við Sund og er mikilvægur liður í sóknarleik liðsins.

Magni Fannar Jónsson – framherji

Magni, fæddur 2006, byrjaði ungur að spila körfubolta fyrir Aftureldingu. Hann fór til ÍR þegar hann var í 9. flokki en kom aftur heim fyrir tveimur árum þegar meistaraflokkurinn fór aftur af stað í Mosfellsbæ. Magni er öflugur þristur sem hefur góða reynslu og nær vonandi að miðla henni til yngri leikmanna í vetur. Hann stundar nám við Fjölbrautaskóla Mosfellsbæjar.

 

 

Björgvin Már Jónsson – framherji

Björgvin, fæddur 2009, hefur spilað upp alla yngri flokkana með Aftureldingu. Hann er kraftmikill fjarki sem skiptir sköpum í baráttuleikjum. Björgvin stundar nám við Fjölbrautaskóla Mosfellsbæjar og er þekktur fyrir sóknarleik sinn á póstinum en einnig hefur hann verið að bæta skotið sitt og verður spennandi að sjá hann fyrir utan 3ja stiga línuna í vetur.

Ísak Rökkvi Guðmundsson – framherji

Enn einn uppalinn Aftureldingarmaðurinn, fæddur eins og svo margir í þessum hóp árið 2009 sem er þekktur sem öflugur varnarmaður. Ísak er þristur sem sýnir mikla alúð og baráttugleði í hverjum leik. Hann stundar nám í rafvirkjun við Fjölbrautarskólanum í Breiðholti og er mikilvægur þáttur í uppbyggingu liðsins.

Símon Logi Heiðarsson – bakvörður

Símon, fæddur 2010, stundar nám við Menntaskólanum við Sund. Hann er skotbakvörður og einn yngsti leikmanna liðsins. Símon sinnir einnig aðstoðarþjálfun í deildinni og sýnir mikla hollustu við félagið. Hann er efnilegur leikmaður sem gaman verður að gefa stærri tækifæri með meistaraflokknum í vetur með bjarta framtíð fyrir sér.

Sigurbjörn Einar Gíslason – miðherji

Sigurbjörn, fæddur 2009, er miðja liðsins og hefur spilað upp allayngri flokka Aftureldingar. Hann er lykilmaður í baráttunni undir körfunni þar sem hann er frábær á rúllinu og er alltaf að taka næstu skref á sínum körfuboltaferli. Hann stundar nám við Verzlunarskóla Íslands. Sigurbjörn er stór og öflugur leikmaður sem veitir liðinu styrk bæði í vörn og sókn.

Alexander Jón Finnsson – bakvörður – (varafyrirliði)

Alexander spilar nú sitt þriðja tímabil með Aftureldingu. Hann er fæddur 2004 og spilar sem bakvörður og einn af okkar reynslumestu mönnum. Alexander kemur með yfirvegun og mjög góðan leikskylning inn í liðið sem og mikið keppnisskap sem smitar vonandi til yngri leikmanna liðsins. Áður spilaði hann með Skallagrími en er nú einnig aðalþjálfari í 6. flokki Aftureldingar. Alexander var valinn körfuboltamaður ársins 2025 í Aftureldingu og kemur með mikla reynslu og leiðtogahæfileika inn í liðið.

Kristófer Óli Kjartansson – bakvörður

Kristófer er 17 ára leikstjórnandi og skotbakvörður sem hefur spilað alla tíð með Aftureldingu. Fæddur 2009 en hann stundar nám í Verzlunarskóla Íslands og er þekktur fyrir góða yfirsýn og hæfileika til að lesa leikinn. Kristófer er hefur tekið miklum framförum undanfarinn ár og verður ákaflega spennandi að fylgjast með honum á parketinu í vetur og taka næsta skref á sínum ferli í fleiri leikmínútum í meistaraflokki. Kristófer er orðin hörkuskytta og leggur allt í sölurnar varnarlega og hefur bjarta framtíð fyrir sér.

Jón Gunnar Shiransson – framherji

Jón Gunnar, fæddur 2006, er nýlega kominn frá Vestra og er uppalinn á Ísafirði. Hann spilar sem framherji og kemur með mikla reynslu frá vestfirskum körfubolta. Jón Gunnar bætir við styrkleika og breidd í framherjaflóru liðsins og við hlökkum til að sjá hann leika í rauðu treyjunni í vetur.

 

 

El Hadji Malick Khouma – framherji

El Hadji, fæddur 1998, er frá Senegal og kemur með alþjóðlega reynslu til Aftureldingar. Hann hefur búið á Íslandi undanfarin misseri ásamt konu sinni og á tvö börn. Hann er 207 cm á hæð og spilar sem framherji. El Hadji hefur spilað m.a. á Spáni, meðal annars í Liga EBA með AD Moraleja CB og CB Aridane í Tercera FEB. Hann á rætur sínar í senegölskum körfubolta hjá Bopp-Port og tók þátt í NBA Academy Africa 2017/18. El Hadji kemur með reynslu, líkamlegan styrk og hæð sem mun styrkja liðið verulega. Frábær viðbót við ungt lið Aftureldingar og kemur til með að aðstoða og leiðbeina okkar bráðefnilega liði í keppni vetrarins.

Ólafur Snær Eyjólfsson – leikstjórnandi – (FYRIRLIÐI)

Eins og áður hefur komið fram hefur Ólafur Snær, fæddur 2003, samið við Aftureldingu og spilar nú sitt annað tímabil með félaginu. Hann er fyrirliði liðsins og leikstjórnandi með mikla reynslu sem spilaði áður með Breiðablik. Ólafur kemur með leiðtogahæfileika, reynslu og yfirsýn sem er ómetanleg fyrir ungt lið. Hann er lykilmaður í því að stýra liðinu bæði á vellinum og utan hans.

Til viðbótar við þennan flotta hóp munu yngri flokks leikmenn vera í kringum hópinn.  Þetta eru þeir Alex Þór Rúnarsson fæddur 2010, Snorri Valur Guðjónsson fæddur 2011 og Aron Rútur Allansson fæddur 2011.  Þeir hafa æft með hópnum í sumar og haust og fá vonandi nokkrar mínútur á parketinu með meistaraflokknum í vetur.

ÞJÁLFARATEYMI

Sævaldur Bjarnason gegnir starfi aðalþjálfara liðsins og hefur unnið gott starf við að þróa þessa unga og efnilega leikmenn. Við hlið hans er Eiríkur Karlsson, Mosfellingur, sem gegnir starfi aðstoðarþjálfara. Saman mynda þeir sterkt þjálfarateymi sem hefur skýra sýn um framtíð körfuboltans í Mosfellsbæ.

 

 

 

 

 

 

 

 

 

FYRSTI LEIKUR TÍMABILSINS

Laugardaginn 3. október kl. 16:00

Fylkir – Afturelding

Staðsetning: Fylkishöllin

 

Við hvetjum alla stuðningsmenn, iðkendur, foreldra og íbúa Mosfellsbæjar til að mæta og styðja strákana okkar í fyrsta leik tímabilsins. Liðið þarf stuðning ykkar og við erum viss um að þetta verður skemmtilegur leikur!

FRAMTÍÐIN ER BJÖRT

Meistaraflokkur Aftureldingar er á réttri leið. Með sterkan hóp leikmanna sem hefur vaxið upp í gegnum yngri flokkana, ásamt reyndum leikmonnum, sjáum við bjarta framtíð fyrir liðinu. Þessi hópur sýnir mikla samheldni, baráttugleði og vilja til að bæta sig stöðugt.

Mætum öll og styðjum strákana okkar á laugardaginn!

 

Fyrir nánari upplýsingar um leiki og æfingar, fylgdu okkur á samfélagsmiðlum eða hafðu samband við deildina.