Aðalfundur Aftureldingar fór fram í gær við hátíðlega athöfn í Hlégarði í Mosfellsbæ. Þar sem hefðbundin aðalfundarstörf fóru fram, venju samkvæmt voru sjálfboðaliðum veittar heiðursviðurkenningar til þeirra sem hafa lagt félaginu lið með óeigingjörnu starfi í gegnum árin.

Fulltrúar úr körfuknattleiksdeild félagsins voru þar á meðal en þeirra framlag byggir á sterkri sjálfboðaliðamenningu sem er burðarás í starfsemi deildarinnar. Heiðar Logi formaður deildarinnar og Berglind Bergs voru sæmd bronsmerki Aftureldingar fyrir framúrskarandi störf.  Berglind gekk úr stjórn á síðasta aðalfundi deildarinnar eftir að hafa setið undanfarin ár í stjórn deildarinnar og nokkur ár sem gjaldkeri.  Deildin þakkar hennir fyrir hennar framlag í uppbyggingu deildarinnar.  Þá hlaut Gísli Jón silfurmerki félagsins fyrir ómetanlegt framlag sitt í gegnum tíðina. Gísli Jón var einnig heiðraður með silfurmerki UMSK sem undirstrikar enn frekar mikilvægi hans í starfi félagsins.

Ljóst er að ekkert slíkt starf verður til í tómarúmi og byggir árangur körfuknattleiksdeildarinnar á öflugum hópi sjálfboðaliða í stjórn og foreldrahópi sem leggja á sig ómælda vinnu af ástríðu og eldmóði. Það er því sérstakt gleðiefni þegar einstaklingar innan deildarinnar fá viðurkenningu sem þessa.

Körfuknattleiksdeildin sendir Heiðari Loga Jónssyni, Berglindi Bergsdóttur og Gísla Jóni Magnússyni, sem og öðrum verðlaunahöfum kvöldsins, innilegar hamingjuóskir og þakkir fyrir þeirra mikilvæga framlag.

Á meðfylgjandi mynd má sjá þau kampakát með afrakstur kvöldsins,

Innilega til hamingju öll 😊

Sævaldur Bjarnason

Yfirþjálfari KKd.Aftureldingar