Það var svo sannarlega nóg um að vera hjá körfuknattleiksdeild Aftureldingar um helgina. Fjölmargir leikir fóru fram hjá yngri flokkum félagsins og ljóst að framtíð körfuboltans í Mosfellsbæ er björt. Unga fólkið fékk sviðið, fullt af leikgleði, baráttu, reynslu og auðvitað fullt af körfubolta! Á meðan meistaraflokkur karla landaði hörkusigri á Reykdælum, 81–79, í spennandi leik í gær, voru framtíðarstjörnurnar okkar á fullu víðs vegar um landið.

8. flokkur – fyrsta mót vetrarins

8. flokkurinn hélt á Álftanes þar sem fram fóru fjórir leikir hjá liðinu. Þetta var fyrsta mót flokksins í vetur og krakkarnir fengu frábært tækifæri til að spreyta sig, takast á við ný verkefni og öðlast dýrmæta reynslu. Sigur vannst í dag og tveir leikir voru í gær. Einn leikur er svo eftir og spennandi að fylgjast með þessum flotta hópi halda áfram að taka framförum.

10. flokkur – sex sigrar í fyrstu sjö leikjunum

10. flokkurinn lék einnig í dag, sunnudag, að Hlíðarenda þar sem strákarnir mættu Valsmönnum. Þeir hafa farið frábærlega af stað á tímabilinu og höfðu fyrir leikinn unnið alla sína sex leiki og auk þess tvo sigra í bikarkeppni KKÍ, komnir þar í 8 liða úrslit. Valsmenn höfðu betur í dag en það er virkilega gaman að fylgjast með þessum öfluga hópi og spennandi að sjá hvað fram undan er hjá strákunum.

11 ára – reynsla í bankann

11 ára krakkarnir, sem eru í 6. bekk, voru í eldlínunni í Valsheimilinu alla helgina. Afturelding tefldi fram tveimur liðum og verkefnið var bæði skemmtilegt og krefjandi. A-liðið nældi í tvo sigra og B-liðið tók þátt í fjórum leikjum. Það mikilvægasta er þó allt sem krakkarnir taka með sér úr svona móti; reynsla, nýjar áskoranir, samvinna og dýrmæt verkefni sem hjálpa þeim að vaxa sem leikmenn. Það er einmitt svona sem framtíðarleikmenn verða til – leikur fyrir leik, æfing fyrir æfingu!

12. flokkur – heimaleikur í Varmá

12. flokkurinn átti leik í Varmá í dag gegn Snæfelli. Enn eitt tækifærið fyrir okkar unga og efnilega leikmenn til að spreyta sig, sýna hvað í þeim býr og halda áfram að þróast sem leikmenn. Þetta var erfiður leikur gegn sterku liði Snæfells sem sigraði leikinn örugglega.
11. flokkur með leik á mánudag
Það er ekki öll helgin búin hjá yngri flokkunum því 11. flokkurinn mætir Breiðablik/Augnablik b á heimavelli í Varmá á morgun, mánudag, klukkan 20:30. Við hvetjum alla til að mæta og styðja við bakið á þessum flotta hópi! Þessi flokkur er skipaður blönduðu liði Aftueldingar og Skallagríms en ákveðið var í haust að fara í samstarf við Borgnesinga með þennan flokk. Þetta samstarf hefur gengið mjög vel og situr nú liðið í öðru sæti í 2. deild með 2 töp en 4 sigra.

Yngstu iðkendurnir á Fjölnismóti

Ekki má gleyma yngstu iðkendunum okkar sem áttu sviðið um síðustu helgi á Fjölnismótinu í Grafarvogi. Þar mætti Afturelding með hvorki fleiri né færri en 24 krakka, eða alls sex lið! Það er virkilega ánægjulegt að sjá allan þennan fjölda ungra iðkenda taka þátt, spreyta sig á körfuboltavellinum og njóta þess að vera hluti af liðsheildinni. Þar kviknar áhuginn, vináttan verður til og grunnurinn að framtíðinni er lagður.

Körfuboltakrakkar á Fjölnismóti – boðið í bíó

Framtíðin er björt í Mosfellsbæ! Það er einstaklega ánægjulegt að sjá þann fjölda barna og unglinga sem klæðast búningi Aftureldingar og leggja stund á körfubolta. Úrslitin eru aðeins hluti af ferðalaginu. Á þessum aldri snýst þetta fyrst og fremst um að læra, bæta sig, njóta þess að spila og byggja upp vináttu og liðsheild. Hver leikur gefur nýja reynslu og hvert mót er mikilvægt skref í þroska leikmannanna. Það er verið að leggja góðan grunn að framtíðinni og framtíðarstjörnur körfuboltans í Mosfellsbæ eru sannarlega á leiðinni!

Stórt hrós til allra leikmanna, þjálfara, foreldra og sjálfboðaliða sem leggja sitt af mörkum. Án ykkar væri þetta ekki hægt.

Það er líf og fjör í körfuboltanum í Mosfellsbæ! – Áfram Afturelding!