Fyrstur á völlinn og síðastur heim – Einar Guðmundsson sæmdur gullmerki

Einar Guðmundsson var sæmdur gullmerki félagsins á lokahófi knattspyrnudeildarinnar fyrir ómetanlegt framlag sitt til félagsstarfsins.

Einar er fyrrverandi leikmaður og heldur áfram að leggja sitt af mörkum, nú sem sjálfboðaliði hjá knattspyrnudeildinni. Hann gengur í öll störf sem til falla á vellinum og sér til þess að leikmenn meistaraflokks karla hafi sem besta aðstöðu til æfinga og keppni.

Liðið hefur náð ótrúlegum árangri í sumar, tryggt sér sæti beint í Bestu deildinni og komist í úrslitaleik Mjólkurbikarsins.

En hvers virði er árangur án samfélagsins sem stendur að baki honum?

Á bak við stór afrek er fólk sem gefur tíma sinn, krafta og hjarta í þágu félagsins. Einar er einmitt einn af þeim sem leggja grunninn að því að slíkur árangur sé mögulegur.

Það lýsir Einari best að hann er fyrstur á svæðið og síðastur heim. Þótt hann sé ekki lengur inni á vellinum er hann svo sannarlega enn mikilvægur hluti af liðinu.

Við óskum Einari innilega til hamingju með verðskuldaða viðurkenningu og þökkum honum fyrir allt sem hann gerir fyrir félagið!