Þjálfarateymi Aftureldingar körfubolta

Það er sannkölluð körfuboltaveisla fram undan hjá körfuknattleiksdeild Aftureldingar og nú er komið að því að kynna fólkið sem mun standa í eldlínunni með iðkendum í vetur! Við erum með sterkt, metnaðarfullt og fjölbreytt þjálfarateymi sem mun leiða krakkana okkar áfram, allt frá fyrstu skrefunum í körfuboltanum og upp í meistaraflokk karla.

Sævaldur Bjarnason verður áfram yfirþjálfari deildarinnar og prímus mótor í starfinu. Hann mun þjálfa meistaraflokk karla auk þess að vera með sameiginlegan æfingahóp 7., 8. og 9. flokks karla. Það er því óhætt að segja að Sæbi verði með puttana í ansi mörgu í vetur og líklega sjaldan langt frá körfubolta!

Eiríkur Karlsson mun þjálfa 11. og 12. flokk karla og jafnframt taka sæti sem aðstoðarþjálfari meistaraflokks karla. Eiríkur fær því tvöfalt hlutverk í vetur og verður mikilvægur hlekkur í því að tengja saman yngri flokkana og meistaraflokkinn.

Hlynur Logi Ingólfsson tekur að sér þjálfun 10. flokks karla. Það verður spennandi að fylgjast með strákunum undir hans stjórn og sjá þá taka næstu skref í sinni körfuboltaþróun. Hlynur er margreyndur þjálfari og tók nú í sumar ný skref sem aðstoðarþjálfari með U15 lið Íslands sem fór á Norðurlandamótið í Kisakallio.  Það verður gaman að sjá hann koma með nýja hluti úr reynslubankanum inn í þjálfun vetrarins.

Alexander Jón Finnsson er leikmaður meistaraflokks karla og kemur nýr inn í þjálfarateymi deildarinnar. Hann mun þjálfa 6. flokk karla, miðað við 11 ára. Það verður sérstaklega spennandi að fylgjast með Alexander í þessu nýja hlutverki. Hann þekkir körfuboltann vel úr leikmannahlutverkinu og fær nú tækifæri til að miðla reynslu sinni áfram til næstu kynslóðar. Við hlökkum mikið til að sjá Alexander taka þessi fyrstu skref á þjálfarabrautinni!

Sigurður Stefán Jónsson heldur áfram með yngstu iðkendur deildarinnar. Hann var með 1.–4. bekk á síðasta tímabili og heldur því starfi áfram í vetur en bætir nú 5. bekk við. Það þýðir að Sigurður verður áfram á mikilvæga staðnum þar sem körfuboltaævintýrið byrjar hjá mörgum af okkar yngstu iðkendum.

Gunnar Ingi Garðarsson verður áfram styrktarþjálfari deildarinnar, bæði yngri flokka og meistaraflokks. Hann kom virkilega sterkur inn i starfið á siðasta tímabili með sínar áherslur á styrk og liðleika. Flestir Mosfellingar þekkja Gunnar Inga af góðu einu en hann hefur einnig séð um styrktarþjálfun hjá knattspyrnudeildinni.

Við erum tilbúin í veturinn! Það er ljóst að spennandi vetur er fram undan hjá körfuknattleiksdeild Aftureldingar. Öflugt teymi þjálfara mun halda utan um iðkendurna okkar, byggja upp körfuboltann frá grunni og skapa umhverfi þar sem bæði leikmenn og lið geta tekið framförum. Við hlökkum til að fylgjast með starfinu í vetur og sjá hvað þessi flotti hópur þjálfara og iðkenda getur gert saman.

Áfram Afturelding!