Einar Andri er einnig yfirþjálfari yngri flokka félagsins auk þess sem hann hefur umsjón með handboltaakademíuna í Fjölbrautaskólanum í Mosfellsbæ.

„Við erum mjög ánægðir að hafa framlengt samninginn við Einar Andra enda er hann einn albesti þjálfari landsins,“ segir Ásgeir Sveinsson, formaður meistaraflokksráðs Aftureldingar.

„Árangur Einars með liðið frá því hann tók við fyrir þremur árum hefur verið mjög góður auk þess sem okkar ungu leikmenn hafa tekið miklum framförum undir hans stjórn. Markmið okkar eru skýr en þau eru að berjast um alla titla sem i boði eru og við væntum mikils af samstarfinu við Einar á næstu árum. Við ætlum að halda áfram að byggja upp sterkt lið í Mosfellsbæ með okkar frábæra leikmannahópi sem samanstendur að langmestu leyti af uppöldum Mosfellingum.“

Uppaldir lykilmenn gera nýjan samning

Fjórir lykilleikmenn Aftureldingar hafa einnig skrifað undir nýjan samning við félagið til þriggja ára, til ársins 2020. Þetta eru þeir Elvar Ásgeirsson, Pétur Júníusson, Böðvar Páll Ásgeirsson og Kristinn Elísberg Bjarkason.

Þetta eru mikil gleðitíðindi fyrir Aftureldingu enda um mjög góða leikmenn að ræða sem hafa mikinn metnað. Þeir hafa allir leikið með unglingalandsliðum Íslands á undanförnum árum. Þeir hafa leikið stórt hlutverk í liði Aftureldingar síðastliðin ár og ætla sér stóra hluti með uppeldisfélagi sínu á næstu árum.