Íris og Þóra María semja við Aftureldingu

Íris Kristín Smith og Þóra María Sigurjónsdóttir hafa framlengt samninga sína við Aftureldingu og munu leika með félaginu næstu tvö árin. Afturelding vann sér sæti í Olísdeild kvenna á næstu leiktíð eftir að hafa unnið Grill66-deildina í vor.

Þóra María hefur þrátt fyrir ungan aldur verið í lykilhlutverki hjá Aftureldingu síðustu tímabil. Hún skoraði 116 mörk í 20 leikjum á síðustu leiktíð í Grill66-deildinni og var markahæsti leikmaður Aftureldingar í deildinni. Þóra er 18 ára gömul og hefur leikið með öllum yngri landsliðum Íslands og er mikil fyrirmynd fyrir yngri iðkendur. Þóra leikur stöðu skyttu eða miðju. Hún er uppalin í Aftureldingu og það er mikið ánægjuefni fyrir félagið að Þóra María spili áfram með Aftureldingu næstu árin.

Íris Kristín hefur leikið með Aftureldingu síðustu tímabil. Hún kom tilbaka með krafti í síðustu leikina í deildinni í vor eftir barnsburðarleyfi. Íris er hornamaður með mikla reynslu og er ekki síst sterkur leiðtogi innan vallar sem utan. Afturelding fagnar því að halda í krafta Írisar næstu tvö tímabil.

Á myndinni eru f.v.: Íris Kristín Smith, Erla Dögg Ragnarsdóttir, formaður mfl. ráðs kvenna, og Þóra María Sigurjónsdóttir.